Conspectus rerum Latinus 8/2006
11 Oct 2006, 13:21
CONCILIUM A TRANSPORTATIONE, TELECOMMUNICATIONE ENERGIAQUE DIE 12 M. OCTOBRIS 2006
Concilium a transportatione, telecommunicatione energiaque die Iovis 12 m. Octobris Luxemburgum ex composito congregabitur. In eo de securitate commeatus aërii civilis lege praestanda et de systemate navigatorio satellitis ‘Galileo’ disputabitur. Propositum est de communicatione Commissionis decernere, in qua de progressu programmatis ‘Galileo’ refertur. Praeterea Concilium disputationem politicam habebit, quonam modo recensio interimistica Libelli albi de politica transportationis conscripti iudicetur. Conventui praeerit Susanna Huovinen, ministra a transportatione et communicatione.
Sessio aperta conventus Concilii, quae ad horam 10.15 (GMT+2) fiet, et coetus diurnariis edocendis, qui hora 15.00 fere (GMT+2) instituetur, interretialiter coram aut in archivo reposita videri possunt in eu2006.fi.
www.eu2006.fi/calendar/vko41/fr_FR/1147702905942/
SUMMUS CONVENTUS UE – INDIA HELSINKII DIE 13 M. OCTOBRIS 2006
Die Veneris, 13 m. Octobris Helsinkii summus conventus UE – India habebitur. Hic maxime ad societatem strategicam Unionis Europaeae et Indiae corroborandam spectat, prout inter utramque partem de futuro modo operandi mense Septembri a. 2005 Novi Delii convenit. Legatis UE praeerit primus minister Matti Vanhanen, legatis Indiae autem primus minister Manmohan Singh.
Coetus diurnariis edocendis, qui ad horam 13.20 (GMT+2) instituetur, interretialiter coram aut in archivo repositus videri potest in eu2006.fi.
www.eu2006.fi/calendar/vko41/fr_FR/1155818840840/
PRINCIPES CIVITATUM AUT REGIMINUM IN URBEM LAHTI DIE 20 M. OCTOBRIS INOFFICIALITER CONVENIENT
Principes civitatum aut regiminum die 20 m. Octobris in urbem Lahti inofficialiter convenient. Paginae informaticae, in quibus diurnarii de commodis ad ipsorum usum praeparatis, ut de hospitiis et vecturis, edocentur, insunt in eu2006.fi.
Incipiet ille conventus inofficialis operibus inter prandium susceptis, in quibus de politica energiae externa disceptabitur. Prandio sumpto etiam de aliis argumentis, ut de immigratione illegali, breviter colloqui vacabit. Thema principale sessionis postmeridianae erit necessitas competitivitatis imprimis per politicam innovativam confirmandae. Post conventum erit cena, cui intererit Vladimir Putin, praesidens Russiae.
En hic horarium coetuum diurnariis edocendis, qui inter conventum diei 20 m. Octobris instituentur: hora 11.30 (GMT+3) (summus conventus inofficialis a re sociali in tres partes divisus); hora 17.30 (GMT+3) (conventus inofficialis principum civitatum aut regiminum); hora 21.30 (GMT+3) (cena negotialis cum praesidente Russiae Vladimir Putin). Coetus diurnariis edocendis interretialiter coram aut in archivo repositi videri possunt in eu2006.fi.
http://www.eu2006.fi/calendar/vko42/fr_FR/1147176801213/
CONSPECTUS RERUM LATINUS
Proximus conspectus Latine divulgabitur die Mercurii, 18 m. Octobris.
