Conspectus rerum Latinus 3/2006
06 Sep 2006, 13:52
CONSILIUM ECOFIN INOFFICIALE HELSINKII DIEBUS 8-9 M. SEPTEMBRIS CONVENIT
Conventus biduanus Consilii ECOFIN permultas res tractabit, in quibus erunt status hodiernus oeconomiae globalis et prospectus futuri, stabilitas mercatuum fiscalium et evolutio institutionalis Fundi Monetarii Internationalis (IMF). Praecedet Consilio ECOFIN conventus Gregis euronis, scilicet duodecim terrarum, quarum moneta communis est euro. Die Veneris, octavo m. Septembris, colloquia praesidialia diurnariis edocendis coram interretialiter fient horis 09.00 (GMT+3), 12.30 (GMT+3), 16.45 (GMT+3). Die Saturni, nono m. Septembris, colloquium praesidiale eodem modo hora 13.15 (GMT+3) emittetur.
Communicationes: www.eu2006.fi/mediaguides/
SUMMI CONVENTUS UE - RES PUBLICA COREAE ET UE - SINAE, HELSINKII DIE NONO M. SEPTEMBRIS
Summus conventus, cui intererunt moderatores Unionis Europaeae et Rei publicae Coreae, atque alter, in quem convenient moderatores Unionis Europaeae et Sinarum, fient Helsinkii die nono m. Septembris. Colloquia praesidialia diurnariis edocendis coram interretialiter fient in eu2006.fi hora 11.45 (UE - Res publicae Coreae) et post meridiem (UE - Sinae)
Communicationes: www.eu2006.fi/mediaguides/
SUMMUS CONVENTUS ASEM6 HELSINKII DIEBUS 10-11 M. SEPTEMBRIS 2006
In summum conventum, qui dicitur ASEM 6, moderatores duodequadraginta terrarum Asiae et Europae atque delegati Commissionis Europaeae venient, ut apertum et sincerum colloquium suscipiant, cuius argumentum principale erit "Vocationes globales - Responsa communia". Emissiones de summo conventu interretiariae praesto erunt in situ www.asem6.fi. Die Dominico, decimo m. Septembris, hora 14.00 (GMT+3) inauguratio conventus his emissionibus praebebitur atque hora 21.45 (GMT+3) colloquium diurnariis edocendis ministri Finnorum primarii. Die Lunae, undecimo m. Septembris, sollemnia conventus concludendi interretialiter emittentur post meridiem, atque colloquium coordinatoris diurnariis edocendis hora 17.30 (GMT+3).
ASEM 6 Sextus summus conventus Asia - Europa: www.asem6.fi
EU2006.FI INSTRUMENTIS COMMUNICATORIIS SERVIT
PRAESIDENTIA DIURNARIOS DIE SEXTO M. SEPTEMBRIS CONVENIT
Die sexto m. Septembris hora 14.15 (GMT+2), minister primarius Matti Vanhanen ad quaestiones diurnariorum coram respondebit et in televisione et in situ interretiario, cui nomen Presidency meets the press, Praesidentia diurnarios convenit. Transmissio fiet per EbS (< Europe by Satellite, Europa per satellitem). Illud colloquium, editum a praesidentia UE Finniae, EbS et YLE (Radiophonia Finniae Generalis), singulis mensibus inter praesidentiam Finniae transmittetur. Quicumque accessum ad interrete aut ad EbS transmissiones per satellitem habet, illud spectare potest.
Praesidentia diurnarios convenit: www.eu2006.fi/pmp/
CONSPECTUS RERUM LATINUS
Proximus conspectus Latine divulgabitur die Mercurii, tredecimo m. Septembris.
Conspectus rerum Latinus: www.eu2006.fi/newsletters/
