Conspectus rerum Latinus 2/2006
21 Jul 2006, 10:13
CONCILIUM IUSTITIAE ET RERUM DOMESTICARUM (JHA) BRUXELLIS DIE LUNAE 24. IULII
Conventus diei Lunae erit primus e tribus conventibus Concilii Iustitiae et Rerum domesticarum (JHA), qui Finnis UE praesidentibus instituentur. In argumentis in indice rerum agendarum principalibus sunt communicationes Commissionis de conspectu programmatis Hagensis, ratio immigrationem globaliter iudicandi et multitudinem immigrantium moderandi. Praesides conventuum Concilii JHA erunt Leena Luhtanen, ministra iustitiae, et Kari Rajamäki, minister a rebus domesticis.
Sessiones Concilii apertae, quae ad horam 10.00 secundum tempus locale Bruxellense (GMT+2) habebuntur, et coetus diurnariis edocendis, cuius hora in pagina interretiali confirmabitur, in www.eu2006.fi coram praesentabuntur.
CONCILIUM COMPETITIVITATIS BRUXELLIS DIE LUNAE 24. IULII
Conventus Concilii Competitivitatis extraordinarius Bruxellis die Lunae 24. Iulii habebitur. Huic conventui, cuius munus maximum est septimam adumbrationem Programmatis Investigationis tractare, propositum est consensum politicum ad hoc programma approbandum invenire. Praeses Concilii erit Mauri Pekkarinen, minister mercaturae et industriae.
Sessio aperta, quae horis 11.00-13.00 secundum tempus locale Bruxellense (GMT+2) fiet, et coetus diurnariis edocendis, qui post illam sessionem instituetur, in www.eu2006.fi coram praesentabuntur.
UE DE REBUS PROXIMI ORIENTIS RECENTIORIBUS VALDE SOLLICITA EST
Praesidentia Unionis Europaeae, cum condicionem securitatis in confinio Israelis et Libani in peius mutatam esse cognovisset, in summam sollicitudinem venit. Itaque Praesidentia omnes partes hortatur, ut a quavis actione, quae efficere possit, ut praesens discrimen aggravetur, temperantia adhibita se abstineant. Eadem ab omnibus civitatibus eius regionis flagitat, ut responsaliter se gerant et omnia ad rerum statum componendum faciant. Quid Praesidentia de rebus in Israele et Libano recens gestis senserit, invenies in www.eu2006.fi.
SESSIONES APERTAE CONVENTUUM CONCILII UE PER INTERRETE DIVULGANTUR
Civitates UE sociae mense Iunio consenserunt, ut sessiones apertae conventuum Concilii ministerialium in Interreti coram transmitterentur. Concilium Rerum Oeconomicarum et Fiscalium (ECOFIN) die 11. Iulii congregatum erat primum, quod sessiones suas apertas ex decreto mense Iunio facto per www coram emittendas curavit. In paginis autem Praesidentiae interretialibus non solum emissiones sessionum apertarum conventuum Concilii exhibentur, sed ibidem etiam e.g. conventus ministrorum informales et coetus diurnariis edocendis post varios UE conventus instituti divulgantur.
Emissiones interretiales in www.eu2006.fi.
PRAESIDENTIA DIURNARIOS CONVENIT
Finni UE praesidentes ad quaestiones diurnariorum tam in televisione quam in www coram respondent. Relatoribus UE, qui Bruxellis sunt, semel in mense facultas dabitur, ut per EbS (hoc compendio Europa per Satellitem indicatur) ministros Finniae ex urbe Helsinki respondentes interrogent, quid de rebus ad praesentia pertinentibus sentiant. Quae sessiones interrogandi et respondendi ab omnibus, qui accessum ad paginam interretialem EbS habent, videri possunt. Auctores programmatis sunt Praesidentia UE Finnorum, Europa per Satellitem, YLE sive Radiophonia Finnica Generalis.
Primum programma ita appellatum (sc. Praesidentia diurnarios convenit), die Iovis 13. Iulii emissum est. Prima hospes eius erat Paula Lehtomäki, ministra a rebus Europaeis.
Praesidentia diurnarios convenit: www.eu2006.fi.
CONSPECTUS RERUM LATINUS
Proximus 'Conspectus rerum Latinus', acta Latina auspiciis Praesidentiae UE Finnorum edita, die Mercurii 6. Septembris 2006 divulgabitur.
Conspectus rerum Latinus: http://www.eu2006.fi/newsletters/
